Bituin

Pumapatak ang mga luha ng langit
Dumadampi sa kalsadang kaninay hinurnong kawali
Hinahanap ko ang iyong pagdating sa mga tumatampisaw na gunita
Ngunit nabubulag sa talim ng mga ligaw na liwanag
Malamig, kalamna'y namamahay
Nais magapos sa mga anghel mong kamay
Dumadagundong ang ingay ng nakabibinging kalungkutan
Mga pumanaw na oras, tumagos ng walang malay
Nasilayan ka sa kalayuan
Bitbit ang pananabik ng matamis na pagkilanlan
Nabuhay ang dugong nakahimlay
Nadama ang sariling minsa’y nawalay
Muling narinig ang musika ng niluhaang kalsada
Magkayakap sa silong ng mga madilim na ulap
Tumingala ako ngunit kapos sa bituing mahagilap
Bumaling sayo, nakita basang bitiun na nagliliyab